Diktatoret dhe grate e tyre

<IMG BORDER="0" ALIGN="Left" SRC="https://i.servimg.com/u/f70/15/70/70/45/hitler10.jpg">Pas çdo tirani në arrati me pasuri dhe flori zakonisht ndodhet bashkëshortja e pangopur. Ja disa prej këtyre personazheve që janë po aq të urryer sa edhe bashkëshortët e tyre

Kjo nuk është një punë që njoftohet nëpër gazetat e specializuara për gjëra të tilla, por sigurisht është një nga punët që të dynd me para dhe pushtet për një kohë të gjatë. Emri i kësaj pune është: grua diktatori.

Aplikantet e suksesshme mund të kalojnë jetën e tyre, pas “fillimit të kësaj pune, me disa prej njerëzve më të pakëndshëm në planet, por në këmbim të kësaj sakrifice sublime ato shpërblehen me pasuri të pallogaritshme, me pallate të shtrenjta, pushtet dhe një standard jashtëzakonisht të lartë jetese, edhe kur gjërat nuk shkojnë më mirë si në ditët “e arta” të pushtetit. Me një menaxhere të kujdesshme për ditët e këqija (me heqjen mënjanë pak nga pak në llogari bankare jashtë vendit të sasive të mëdha të arit) një diktator nuk do të ketë kurrë probleme financiare edhe kur ta përzënë nga pushteti. Të paktën standardi i tij i jetesës nuk do të ndryshojë aspak. Por ato që kanë dëshirë që të “punojnë” si bashkëshorte diktatorësh duhet që të jenë vazhdimisht të ndërgjegjshme se ka gjithmonë një rrezik që masat e shtypura të popullit, në një moment të veçantë të iluminohen dhe në këtë rast ato duhet që të përgatiten që të bëjnë një metamorfozë brenda vetes pra të ndryshojnë statusin nga gra diktatori në gra ish-diktatorësh.

Rrëzimi i Presidentit të deritanishëm tunizian, Ben Ali, pas 23 vitesh pushteti despotik në vendin e bukur turistik është një shembull i gjallë i faktit që në këtë botë sado që ta kenë për disa kohë të çelikosur pushtetin, diktatorët nuk qëndrojnë përgjithmonë. Vjen një ditë që mbushet kupa dhe ata përmbysen..kjo do të thotë që të paktën gratë e tyre që nuk është se kanë shumë punë për të bërë, duket që pak nga pak, edhe kur janë në ditë të mirë, të bëjnë plane për të ikur me duart plot nga vendi në të cilin kanë sunduar dhe të cilin e kanë dhunuar duke i dhënë edhe një dhunim të fundit dhe një grabitje për t’u vënë kapak të gjitha të mëparshmëve. Një grua e “mençur” diktatori di që të përgatitet për ditët e këqija, që në kohët e mira.

Bashkëshortja e ish-presidentit tunizian, Leila, ishte një nga ato gra që e kishte pasur nuhatjen të fortë dhe si pasojë kishte kohë që përgatitej për një rast “fatkeq”. Sipas raporteve të kësaj jave, ish-berberja 53-vjeçare, bija e një shitësi zarzavatesh, kishte kohë që organizonte ikjen përmes zhvendosjes së 37 milionë paundëve marrë nga banka e vendit të saj në atë të Dubait dhe më pas në Arabinë Saudite. Zyrtarët e bankës tuniziane nuk e kanë pranuar ende një akuzë të tillë, pra për çlirimin e kësaj sasie shumë të madhe të arit, por njerëzit në rrugë nuk kanë dashur që t’ia dinë nga këto deklarata dhe kanë kërkuar nëpër rrugët e vendit në të cilat janë derdhur për të protestuar se duan që ari t’u kthehet pas. Njerëzit e dinë shumë mirë që një klan gjakpirësish si ai i njerëzve të afërm të ish-zonjës së parë nuk do të qëndronte duarlidhur ndërsa pushteti i Ben Ali shembej.

Ata kanë marrë me vete pasuri të mëdha për të vazhduar siç ndodh gjithmonë me ish-diktatorët dhe familjet e tyre jetën e lumtur edhe pas rrëzimit nga pushteti. Ky është një fakt që nuk mund të mohohet dhe që mund të ilustrohet me shumë raste ish-diktatorësh që e kanë bastisur vendin para se ta linin.

Një grua diktatori ka një pozicion shumë më të favorshëm se ai i bashkëshortit të saj. Ndërsa disa diktatorë përfundojnë në gjykatë për krime lufte dhe janë pjesë e proceseve të gjata gjyqësore si në rastin e Millosheviçit, Sadam Huseinit, apo Çarls Tejlorit, një grua “e pafajshme” diktatori nuk pëson një nga këto persekutime. Udhëtimi i ish-zonjës së parë të Tunizisë me gjithë këtë sasi ari është vetëm një nga rastet e udhëtimeve të tilla të bëra gjatë kohësh nga gratë, apo të afërmit e diktatorëve të përmbysur në të gjithë botën. Të paktën po t’u referohemi 5 dhjetëvjeçarëve të fundit kemi shumë shembuj me të cilët mund të ilustrojmë këtë dukuri. Lëvizjet dhe trazirat e mëdha politike të viteve ’70 dhe ’80 sollën një sërë ndryshimesh në regjimet e Amerikës Latine, Lindjes së Mesme dhe Azisë Juglindore. Pjesa më e madhe e ish-diktatorëve të përmbysur, që kanë qenë pro-perëndimorë, janë strehuar në vendet e Europës Perëndimore dhe në Shtetet e Bashkuara të Amerikës. Gruaja e Shahut të Iranit, Farah Pahlavi, ende vazhdon që të jetojë mes Parisit dhe Nju Jorkut, ndërsa ish-gruaja e diktatorit të Filipineve, Imelda Markos, jeton e lumtur dhe e pasur në Havai dhe madje është duke u përpjekur, me gjithë moshën e madhe, që të kthehet në mënyrë të suksesshme në vendin e saj në rolin e një politikaneje.

Një tjetër rast më i freskët është ai i Arabisë Saudite që është shndërruar në një destinacion për strehimin e “burrave të fortë” të botës myslimane. Ben Ali që është vendosur në këtë vend, pasi u përzu nga vendi i tij pasoi ugandezin kriminel, Idi Amin, dhe ish-presidentin pakistanez, Mushaf, të cilët i kërkuan gjithashtu strehim mbretërisë së sauditëve kur e panë se populli i tyre i përzuri me shqelma. Por jo të gjitha ikjet në mërgim vazhdojnë sipas planifikimit. Ndonjëherë në këtë rrugëtim ndodhin edhe të papritura. Elena Çaushesku dhe bashkëshorti i saj, Nikolae, u përpoqën që të shpëtonin lëkurën përmes helikopterit të tyre privat kur regjimit të tyre brutal i erdhi fundi në vitin 1989, por nuk arritën që ta realizonin duke u kapur nga revolucionarët dhe duke u ekzekutuar pas një gjykimi shumë të shkurtër dhe shumë të shpejtë.

Ata që arrijnë t’i shpëtojnë këtij gjykimi kaq të shpejtë, jeta në luks nuk është një garanci në të gjitha rastet. Sarah Kyolaba Amin, gruaja e pestë e diktatorit të Ugandës, për të fituar bukën e gojës pas rrëzimit nga pushteti i të shoqit punon si modele veshjesh në Gjermani. Më pas u zhvendos në Mbretërinë e Bashkuar për të çelur një kafene e cila u mbyll për shkak të vërejtjeve të inspektorëve të shëndetësisë.

Gruaja e Musolinit ia hodhi më mirë se e dashura e Duçes, Klareta Petaçi, e cila u ekzekutua nga partizanët italianë. Gruaja arriti që t’i mbijetonte luftës dhe të kalonte pjesën e mbetur të jetës duke drejtuar një restorant makaronash në vendin e saj të lindjes. Por këshilla më e mirë për ato që duan të punësohen si gra diktatorësh është “mbani gjithmonë me vete një çantë me para. Asnjëherë nuk i dihet”.

Michele Bennet

Bennet, një grua shumë e sofistikuar u martua me Zhan Klod Dyvaljenë në vitin 1980 me një dasmë që kushtoi 5 milionë dollarë. Në Haiti regjimi i Duvaljesë përdori frikën dhe represionin për të nënshtruar dhe zhvatur popullin, përmes policisë sekrete dhe transferoi miliona dollarë në bankat europiane. Çifti shkoi në Francë, më saktë në Rivierën franceze për të vazhduar jetë në luks edhe pas rrëzimit të diktatorit. Pas dhjetë vitesh në mërgim, ata u divorcuan dhe thuhet se Duvalje humbi shumë pasuri me këtë rast.
Sarah Kyolaba Amin

Ishte gruaja e 5-të e Idi Aminit, e cila iku së bashku me të në Libimkur, i shoqi u përmbys nga pushteti në vitin 1979. Në vitin 1982 ajo e la Idin dhe kërkoi strehim politik në Gjermani ku punoi si modele veshjesh të brendshme. Në vitin 1999 i shpëton një dënimi me burg në Londër. Tani, 55-vjeçare është organizuese festash po në Londër. Vitin e kaluar mori një çmim për të shoqin i cili konsiderohet si Presidenti më i mirë i Ugandës në të gjitha kohërat. Në fakt, ishte një superkriminel
Begum Sehba Musharaf

Begum Sehba Musharaf e kaloi pjesën më të madhe të kohës si gruaja e Presidentit duke pritur zonjat e para të vendeve të tjera nga gruaja e Bushit e deri te Rania, Mbretëresha e Jordanisë. Musharaf u përball me akuza për shkelje të Kushtetutës së vendit dhe u dorëhoq nga posti presidencial në vitin 2008 dhe u zhvendos së bashku me të shoqen në një apartament shumë luksoz në qendër të Londrës.
Farah Pahlavi

U martua me ish-shahun e Iranit në vitin 1959 në moshën 21-vjeçare. Për pjesën më të madhe të kohës ishte një figurë popullore, ndërsa regjimi shihej si një tregim që gjithnjë e më pak mbronte interesat e njerëzve, në vitin 1979 lë Iranin me shahun e përmbysur dhe katër fëmijët e tyre pas Revolucionit islamik. Shahu thuhet se mori shumë pasuri me vete e zhvendosi familjen nga një vend në tjetrin. Që nga ajo kohë ajo pati shumë tragjedi personale me dy fëmijë që vranë veten. Megjithatë pasuria e familjes mbetet e madhe.
Murjana Markoviç

Thuhet se ajo ishte forca e vërtetë e çiftit Millosheviç “kasapit të Ballkanit” që vdiq ndërsa po gjykohej në Hagë. Mirjanna është në mërgim në Francë dhe akuzohet për përfitim miliona eurosh nga kontrabanda e cigareve. Ka pasur fiksim peliçet, havjarin, parfumin francez dhe operacionet plastike
Cathrine Martine Denguiade

Jean Bedel Bokasa erdhi në fuqi në Republikën e Afrikës Qendrore në vitin 1977 dhe e dekretoi që të gjithë nxënësit duhet që të mbanin uniforma. Pati shumë protesta, sepse furnizuesja e vetme në vend e uniformave ishte pikërisht bashkëshortja e tij, Cathrine. Kur ai u përmbys në vitin 1979 çifti shkoi në Francë për të jetuar në një kështjellë në periferi të Parisit.
Bobi Ladawa

U martua në vitin 1980 me diktatorin e Zairesë, Mobutu Sese Seko. Bobi Ladawa ishte gruaja e tij e dytë edhe thuhet se diktatori pati fëmijë edhe me motrën e saj binjake. Në vitin 1997 ikin nga vendi pas 31 vitesh në pushtet. Gjetën strehë në Marok, por një vit më pas diktatori vdiq nga kanceri i prostatës. Thuhet se gjatë kohës në pushtet vodhi miliarda dollarë.
Margot Henecker

Gruaja e ish-liderit të Gjermanisë Lindore vetë një ish-ministër i Arsimit iku në Moskë në vitin 1991 për të shmangur gjykimin për krime. Ajo kishte pseudonimin “shtriga rozë”. Një vit pas vajtjes në Moskë u përzu nga Boris Jelcin. Honeker jeton në Kili tani.
Samira Shahbandar

Gruaja e dytë e Sadam Huseinit. Ai pati pas saj edhe dy të tjera. Ata të dy kishin marrëdhënie me njëri-tjetrin kur ende ishin të dy të martuar me persona të tjerë. Ajo iku nga Iraku në Liban pas sulmit amerikan. Në një intervistë tha se kishte marrë nga Sadami 5 milionë dollarë kesh para se të ikte si dhe shumë sasi ari

Burimi: Gazeta Shqip